الرئيس المناضل جمال مبارك !!!!!!

النهاردة هنتكلم عن أعظم رؤوساء مصر بلا منازع
الرئيس جمال مبارك
أييييييه؟
ده ياجدعان باعتبار ماسيكون
وبصراحة الموضوع عبارة عن تخيل ماذا سيحدث عام 2011
مش هنقعد نتكلم عن مؤامرات التوريث ولا غيرها لان الناس تعبت خلص من كتر الكلام والموضوع واضح وضوح الشمس
اما بالنسبة لى فانا متوقع أكثر من سيناريو

العادى اللى هيحصل ان شاء الله معلش انا متشائم لكنها الحقيقة الانتخابات هتمشى عادى خالص ويتولى جمال مبارك الحكم عن طريق أنتخابات رئاسية لانه مافيش حد يقدر ينافسه بسبب الشروط الرائعة للترشح لانتخابات الرئاسة وكمان تكسير عضم المعارضين واعتقال كل من لهم قبول عند الناس وكمان الاشادات الرائعة بعبقرية جمال مبارك من قبل بعض رجال الدين ومن رجالات الحزب الوطنى ومنبعض الفنانين والممثلين وكمان روح اليأس اللى بيشيعوها ان جمال هو الحل أحسن ما يوصل الاخوان او يوصل واحد معارض متهور يورط البلد فى حرب
طب
ايه بقى اللى ممكن يحصل

1/هتحصل مظاهرات قوية تقودها قوى المعارضة معتمدة على بعض الجماهير المخنوقة من عيشتها وسينتهى الامر بقمعها والقبض على رؤوسها وقانون طوارئ يامعلم مع وعود رائعة للشعب الطيب بالاصلاح والتنمية مع منحة وعلاوة وهوب خلصت الحكاية ومع تلفيق كام تهمة للمعارضين وتبقى فضيت البلد يامعلم للرئيس المناضل جمال مبارك اللى قضى على رؤوس الارهاب فى مصر وحررها من الافاقين بتوع المعارضة وسيقودها فى مسيرة التنمية والازدهار

2/ تدخل الجيش
ثورة المؤسسة العسكرية
طب ليه؟؟؟؟
لان الرئيس المناضل ولى العهد جمال مبارك مش من الجيش وماننساش ان مصر من ساعة الثورة ماحكمهاش غير رجال جيش فبالتالى السلطة للمؤسسة العسكرية وانا مااعتقدش ان المؤسسة العسكرية هتتخلى عن قوتها بالسهولة ديه الا طبعا لو فيه اتفاق مبرم مابين مجلس التمهيد للوريث والمؤسسة العسكرية

لكن فى حالة الثورة العسكرية ففى احتمالين
بقيادة عمر سليمان وده هيبقى اجمد انقلاب عسكرى فيكى يامصرى لان الراجل ليه شعبية فى الشارع المصرى والناس بتحترمه
وهو مش هيبهدل مواطنين ولا حاجة لكن هيظبط الحزب الوطنى وهيصالح الشارع عشان يكتسب المزيد من الحب له

او حد من قيادات الجيش وده هيقابل برفض لكن طبعا مافيش فايدة لان الجيش هيسيطر على الامر كله
وبصراحة ده سيناريو مستبعد

3/وده اللى انا نفسى يحصل بجد هتقوم ثورة شعبية بجد ضد جمال وابوه و وان المعارضة تتفق على شخص قوى له حب فى قلوب الناس قاضى مثلا او شخصية سياسية مرموقة وتلتف حوليه المعارضة ويننطوه لكرسى الحكم بناء على ثورة شعبية وحالة عصيان مدنى كامل فى الشارع
طبعا ده يستلزم حيادية المؤسسة العسكرية
وان كنا نتوقع ان السيناريو ده مستحيل

أعتقد ان ديه التلات سيناريوهات العامة المحتملة لو حد شايف حاجة تانية يقولى طبعا الكلام ده بوجه عام لكن الخاص له حديث أخر